پاؤر کمیٹی چترال کا چیئرمین پی ٹی آئی عمران خان سے ملاقات،بجلی کی ابتر صورت حال کے بارے اُنہیں آگاہ

چترال(نمائندہ آواز)پاؤر کمیٹی چترال کے صدر خان حیات اللہ خان،چیئرمین ناصر احمد اور نائب صدر محمد کوثر ایڈوکیٹ نے وفد کے ساتھ چترال ٹاون میں بجلی کی ابتر صورت حال کے سلسلے میں پاکستان تحریک انصاف کے چیئرمین عمران خان سے گورنر کاٹیج میں ملاقات کی۔ملاقات میں جہانگیر ترین،صوبائی وزیر تعلیم عاطف خان،صوبائی وزیر اباشی و اطلات شاہ فرمان خان اورضلعی صدر پی ٹی آئی عبداللطیف بھی موجود تھے۔صدر پاؤر کمیٹی خان حیات اللہ نے اس موقع پر کہا کہ چترال ٹاؤن جس کی آبادی چالیس ہزار کے لگ بھگ ہونے باوجود گذشتہ بیس سالوں سے بجلی کے بحران کا شکار ہے ۔ ان مسائل کو مدنظر رکھتے ہوئے تما م پارٹیوں کے رہنماؤں نے ملکر ’’ پاورکمیٹی ‘‘کے نام سے غیر سیاسی تنظیم بنا کر گذشتہ چھ سالوں سے بجلی کے بحران کو ختم کر نے کے لئے کوششیں شروع کئے اور آخر کار S.R.S.P سے درخواست کرنے پر دو میگاواٹ بجلی گھر کاگولین میں برموغ کے مقام پر سنگ بنیاد رکھا گیا اورسنگ بنیاد تقریب میں صوبائی وزیر محمود خان شامل تھے اورایک ماہ پہلے دوبارہ صوبائی وزیر محموخان نے یورپین ڈونر کے ساتھ بجلی گھرکا افتتاح کیا ۔مگر کروڑوں روپے کے لاگت سے بننے والی یہ ہائیڈل پاؤر ابھی تک مطلوبہ بجلی ٹاؤن کو دینے میں ناکام ہو چکا ہے اور آس پاس کے دیگر علاقوں کو بجلی کی ترسیل جاری ہے جو کہ ٹاون سے باہرکے علاقے ہیں۔ اور ٹاون جس کے لئے بجلی گھر بنایا گیا تھا کو بجلی دینے میں حلیے بہانوں سے کام لیا جارہا ہے۔اُنہوں نے کہا کہ کچھ دیہات غیر قانونی طورپر بجلی استعمال کررہے ہیں اور ڈسٹرکٹ انتظامیہ کو بار بار نشاندہی کے باوجود اُن کے خلاف کاروائی نہیں کی جارہی اس معاملے کی تحقیقات کرائی جائے اور ٹاؤن کے لئے بجلی کی فراہمی کو یقینی بنائے۔
خان حیات اللہ خان نے کہا کہ چترال میں بل ریکوائری 100فیصد سے زیادہ ہے لیکن اس کے باوجود نیشنل گرڈ سے واپڈا کی بجلی مطلوبہ ولٹیج پر چترال کو نہیں دیا جا رہا ہے ۔اور غیر اعلانیہ لوڈشیڈنگ کا سلسلہ جاری ہے اس کابھی نوٹس لیا جائے۔
چیئرمین پاکستان تحریک انصاف عمران خان نے وفد کو یقین دلایا کہ متعلقہ اداروں کے زمہ داران سے اس سلسلے میں بات کرکے چترال ٹاون کو درپیش مسئلے بجلی کی ابتر صورت حال پر قابو پایا جائیگا۔اُنہوں نے کہا کہ اداروں کے مابین عدم تعاون کے وجہ سے چترال ٹاون کو بجلی کی فراہمی میں مسائل درپیش ہورہے ہیں جس کا تدارک کرنے کے لئے ڈی سی چترال،ایس آر ایس پی اور پیڈو کے حکام سے بات کی جائے گی۔وفد نے عمران خان اور دیگر قائدین کا شکریہ ادا کیا۔