تازہ ترین

وفاقی کابینہ کی تشکیل کیلئے شہبازشریف کی اتحادیوں سے مشاورت مکمل ، مریم اورنگزیب کو وزیر اطلاعات بنائے جانے کا امکان

اسلام آباد ( اواز چترال)  وزیراعظم میاں محمد شہباز شریف نے نئی وفاقی کابینہ کی تشکیل کے لیے اتحادی جماعتوں سے مشاورت مکمل کر لی۔ وزیراعظم شہباز شریف نے پہلے دن کا آغاز سب اتحادی قائدین کے گھر جا کر ملاقاتوں سے کیا۔ وزیراعظم شہباز شریف نے پی پی پی کے چیئرمن بلاول بھٹو زرداری، آصف علی زرداری اور ایم کیو ایم کے ڈاکٹر خالد مقبول صدیقی سے ملاقات کی جبکہ مولانا فضل الرحمان سے انکی رہائش پر ملاقات کی۔ اسکے علاوہ وزیراعظم شہباز شریف نے سردار عطاء اللہ مینگل، ڈاکٹر خالد مگسی، شاہ زین بگٹی، اسلم بھوتانی سے بھی ملاقات کی اور وزیراعظم کے منصب پر اپنی نامزدگی، حمایت میں ووٹ اور تعاون پر فرداً فرداً سب قائدین، راہنماؤں، اراکین قومی اسمبلی کا شکریہ ادا کیا۔ اتحادی جماعتیں اپنے وزراء کے نام وزیر اعظم کو جلد بھجوا دیں گے۔ وزیراعظم شہباز شریف نے اتحادی جماعتوں کے قائدین سے کابینہ کی تشکیل پر اہم مشاورت کی۔ وزیراعظم کا کہنا تھا کہ اسی جذبے اور باہمی اعتماد سے آگے بڑھیں گے جس کے ذریعے اس منزل تک پہنچیں ہیں۔ اتحاد، مشاورت اور تعاون کے جذبے سے چلیں گے، مل کر مسائل حل اور وعدے پورے کریں گے۔ وزیراعظم شہباز شریف ایم کیو ایم سے ملنے کے لیے پارلیمنٹ لاجز پہنچ گئے جہاں انہوں ںے ایم کیو ایم کے رہنما ڈاکٹر خالد مقبول صدیقی سے ان کی رہائش گاہ پر ملاقات کی۔ ملاقات میں ایم کیو ایم کی جانب سے وسیم اختر، امین الحق اور جاوید حنیف شریک تھے جب کہ وزیراعظم کے ہمراہ راناثناء اللہ، خواجہ سعد رفیق، ایاز صادق اور مریم اورنگزیب موجود تھیں۔ وزیر اعظم کی ایم کیو ایم رہنماؤں سے ملاقات کے دوران مختلف امور پر بات چیت ہوئی اور طے پایا کہ آنے والے چند دنوں میں وزیراعظم ایم کیو ایم کے مرکز کراچی بہادر آباد جائیں گے، ساتھ ہی مزار قائد پر بھی حاضری دیں گے جہاں ایم کی ایم کی قیادت ان کے ہمراہ ہوگی۔ وزیراعظم شہباز شریف پیپلز پارٹی کے صدر آصف علی زرداری اور چیئرمین بلاول بھٹو زرداری سے ملاقات کے لیے زرداری ہاؤس پہنچے جہاں ان کے درمیان ملکی سیاسی صورت حال پر تبادلہ خیال کیا گیا۔ آصف علی زرداری کے سابق وزیراعظم راجہ پرویز اشرف موجود تھے جب کہ وزیراعظم کے ہمراہ ایاز صادق، رانا ثنااللہ، سعد رفیق اور مریم اورنگزیب موجود تھے۔ معلوم ہوا ہے کہ  مسلم لیگ (ن) کے رہنما رانا ثنااللہ کو کابینہ میں وزارت داخلہ اور مریم  اورنگزیب کو اطلاعات کا قلمدان  دیے جانے کا امکان  ہے۔ ذرائع کا کہنا ہےکہ آج وفاقی کابینہ کے ناموں کو حتمی شکل دی جائےگی اور آج رات تک کابینہ کا اعلان کر دیا جائے گا۔ واضح رہےکہ گزشتہ ہفتے اپوزیشن کے اجلاس میں سابق صدر  آصف زرداری نے بھی رانا ثنااللہ کو وزیر داخلہ  کہہ کر مخاطب کیا تھا۔

Facebook Comments

متعلقہ مواد

Back to top button