کورونا: چترال میں دفعہ 144 نافذ،چترال پولیس . رات بارہ بجے کے بعد پبلک ٹرانسپورٹ پر پابندی

چترال( نمائندہ آوازچترال) چترال کی ضلعی انتظامیہ نے ضلع میں کورونا وائرس کے پھیلاؤ کی روک تھام کے لئے جمعرات کو دفعہ 144 نافذ کردی۔دفعہ 144 کے تحت، تمام ریستوران، کھانے پینے، فاسٹ فوڈ، آؤٹ لیٹس، بیوٹی پارلر، شادی بیاہ / شادی ہال، سیمینارز، ورکشاپس وغیرہ میں پانچ سے زیادہ افراد کے جمع کرنے پر پابندی ہوگی۔ ڈپٹی کمشنر لوئر چترال نوید احمد نے ایک اعلان میں کہا ہے کہ یہ پابندی 30 دن تک نافذ رہے گی۔ انہوں نے کہا کہ پی پی سی کی دفعہ 188 کے تحت دفعہ 144 کی خلاف ورزی کی سزا ہوگی۔ ادھر چترال پولیس نے اعلان کیا ہے کہ آج (19 مارچ) کی آدھی رات سے چترال میں تمام مسافر گاڑیوں جیسے بسوں، ویگنوں اور ٹیکسیوں پر پابندی ہوگی۔ صرف نجی گاڑیوں کو سڑکوں پر جانے کی اجازت ہوگی۔