روپے کے مقابلے میں ڈالر کی قیمت میں تباہ کن اضافہ، وزیر خزانہ اسد عمر کو مہنگا پڑ گیا، وزیراعظم عمران خان کے صبر کا پیمانہ بھی لبریز، بڑا فیصلہ سنا دیا جمعہ 12 اکتوبر 2018 | 19:01
اسلام آباد ( آوازچترال رپورٹ) پاکستانی روپے کے مقابلے میں ڈالر کی قیمت میں مسلسل اضافے کی بدولت وزیراعظم عمران خان کا صبر کا پیمانہ بھی لبریز ہو گیا، نجی ٹی وی چینل کی رپورٹ کے مطابق انہوں نے وفاقی وزیر خزانہ اسد عمر کی معاشی پالیسیوں پر عدم اطمینان کا اظہار کرتے ہوئے ایک ہفتے میں قوم کو اقتصادی صورتحال پر اعتماد میں لینے کا فیصلہ کر لیا ہے۔ وزیراعظم عمران خان کی زیر صدارت پارٹی رہنماؤں کا غیر رسمی اجلاس ہوا، اس اجلاس میں انہوں نے وزیر خزانہ کی معاشی پالیسیوں پر عدم اطمینان اور ان کی کارکردگی پر برہمی
کا اظہار کیا، وزیراعظم عمران خان نے کہا کہ وزیر خزانہ اسد عمر کو اقتصادی صورتحال پر پیشگی منصوبہ بندی کرنی چاہیے تھی اس کے علاوہ آئی ایم ایف سے رجوع کرنے میں پس و پیش کی پالیسی سے بھی نقصان ہوا۔ ٹی وی ذرائع کے مطابق وزیراعظم عمران خان نے کہا کہ ٹھوس منصوبہ بندی نہ ہونے کی وجہ سے عوامی ردعمل کا سامنا کرنا پڑا، انہوں نے ایک ہفتے میں اقتصادی صورتحال پر قوم کو اعتماد میں لینے کا فیصلہ کیا ہے۔
